David Elsmere, Rheolwr Partneriaeth, Cynllun Restart yn Serco
Mewn oes pan fo technoleg a marchnadoedd swyddi yn esblygu’n gyflym iawn, mae sicrhau fod gan unigolion y sgiliau angenrheidiol i ddatblygu yn dod yn hanfodol. Gan fod 26.5% sylweddol o’r boblogaeth oedran gwaith yng Nghymru yn parhau i fod wedi ymddieithrio o’r farchnad lafur, mae’n amlwg fod angen dulliau gweithredu newydd.
Dechreuodd Cynllun Restart yn dilyn COVID-19 yn 2021 ac mae’n gynllun gan y llywodraeth sy’n anelu i helpu pobl (cyfranogwyr) i ddatblygu eu sgiliau a chanfod cyflogaeth gynaliadwy. Mae Serco yn cyflwyno’r Cynllun Restart yng Nghymru ar ran yr Adran Gwaith a Phensiynau (DWP). Mae Cynllun Restart yn deall y farchnad swyddi, gan ddefnyddio technoleg newydd a hyfforddiant digidol cynhwysfawr i ymrymuso pobl yng Nghymru sy’n chwilio am swyddi, gan sicrhau eu bod wedi paratoi’n dda ar gyfer marchnad swyddi y dyfodol.
Hyfforddiant mewn Sgiliau Digidol
Gan sylweddoli fod llythrennedd digidol yn hanfodol ym marchnad swyddi heddiw, mae Hyfforddwyr Cynllun Restart Serco yn cynnig ystod o gyrsiau sgiliau digidol i’r cyfranogwyr ar gynllun Restart. Mae hyn yn cynnwys sgiliau cyfrifiadurol sylfaenol, e-bost yn y gweithle a defnyddio peiriannau chwilio. Caiff y gwahanol gyrsïau eu cynnig i gyfranogwyr yn seiliedig ar eu set sgiliau cyfredol. Yn ogystal â hyn, mae Hyfforddwyr Cynllun Restart yn cynnig cyrsiau sgiliau digidol-wythnos i unrhyw gwsmer Canolfan Byd Gwaith a Mwy sydd dros 50 oed. Nod yr hyfforddiant yw pontio’r bwlch ar gyfer pobl dros 50 oed ac unigolion gyda sgiliau isel, gan roi’r wybodaeth angenrheidiol iddynt ffynnu mewn amgylchedd digidol yn gyntaf. Cynigir yr hyfforddiant mewn Canolfannau Byd Gwaith a Mwy lleol yn Ne Ddwyrain Cymru a maent yn cynnwys popeth o weithredu cyfrifiadur sylfaenol i bensiynau a siopa ar-lein. Mae’r holl gyrsiau a gynigir gan Serco yn sicrhau addysg ddigidol gynhwysfawr sy’n galluogi’r unigolyn i fod â mwy o ymwybyddiaeth o dechnoleg.
Defnyddio Deallusrwydd Artiffisial
Integreiddio Deallusrwydd Artiffisial (AI) yw un o’r ffyrdd y mae Serco yn trawsnewid gwasanaethau cyflogadwyedd. Drwy awtomeiddio tasgau fel ysgrifennu CV a nodiadau cyfarfod, mae AI yn cynyddu cynhyrchiant ein anogwyr swyddi yn sylweddol. Mewn sesiwn arferol un-i-un ar ysgrifennu CV, gall anogwr gael sgwrs 10 munud gyda’r sawl sy’n cymryd rhan ac wedyn, gan ddefnyddio AI, lunio CV da mewn tua munud. Yn ogystal â symleiddio’r broses mae hyn yn sicrhau fod pawb sy’n cymryd rhan yn gadael gyda CV proffesiynol a deniadol, a gafodd ei deilwra o’r adolygiad diagnostig oedd yn crynhoi eu hanes gwaith, cymwysterau a nodau gyrfa.
Cefnogi anghenion amrywiol drwy ddulliau gweithredu wedi eu teilwra
Mae Cynllun Restart yn deall fod y sawl sy’n cymryd rhan yn wynebu rhwystrau lluosog i gyflogaeth, o broblemau iechyd i ddiffyg addysg ffurfiol. Nid oes gan tua 19% o’r cyfranogwyr unrhyw gymwysterau ffurfiol, a chymwysterau dan lefel 2 sydd gan bron eu hanner. Dywed cyfran sylweddol mai sgiliau digidol gwael sydd ganddynt. Mae gan 13% gymhwyster Lefel 5 neu uwch. Ar ôl cynllun peilot llwyddiannus, fe wnaethom ymestyn ein cynnig ar gyfer graddedigion ledled Cymru dan yr enw ‘Restart Scheme Blue’ lle mae gan y cyfranogwyr fentor neilltuol un i un am 12 wythnos fydd yn eu helpu gyda ymchwil LinkedIn, meithrin hyder a gwytnwch a datblygu llwybrau gyrfa i ganfod swydd sy’n cyfateb eu profiad. Fel canlyniad, nid dim ond canolbwyntio ar anghenion sgiliau ar unwaith y mae Cynllun Restart ond hefyd yn sicrhau fod pawb sy’n cymryd rhan yn symud tuag at gyflogaeth a datblygu sgiliau parhaus.
Yr effaith hyd yma
Ar hyn o bryd mae 6,912* o bobl sydd wedi canfod cyflogaeth cynaliadwy yng Nghymru drwy Gynllun Restart ers ei ddechrau yn 2021. Wrth edrych i’r dyfodol, bydd yn hanfodol gwerthuso ac addasu ein strategaethau yn barhaus. Wrth i’r farchnad swyddi barhau i esblygu gyda datblygiadau technolegol, felly hefyd fydd yn rhaid i’n dulliau hyfforddi a datblygu. Mae cynllun Restart yn ymroddedig i sicrhau fod gweithlu Cymru wedi paratoi ar gyfer heriau heddiw ond hefyd yn barod ar gyfer cyfleoedd yfory.
*data hyd at 8.11.24
